【台語世界／錄音】考試ê時陣

文、錄音／A-ka

咦？是啥物人tī教室內底中氣十足、講話真大聲leh？原來，是阮hit ê端莊、頂真koh嚴格ê老師teh交代功課lo͘h！阮老師一向是hoah水會堅凍、chàm腳會地動，學生囡仔lóng對伊chiâⁿ尊chhûn。老師用真嚴肅ê口氣kā大家吩咐：「後禮拜著beh考試ah，大家ài認真讀冊，好好仔加油ǒ͘！」全班一聽著chit ê消息，隨ê仔隨ê lóng「唉！」一聲，吐一ê大氣。

對阮學生來講，「考試」是一件天大地大ê代誌。Ta̍k-pái nā聽著beh考試，我著會憂頭結面，心肝頭kui-ê phah-kat-kiû，知影歹命艱苦ê日子又koh來ah。Ài讀ê冊thia̍p- -起來，是比山koh-khah koân，而且chit段時間bē-su teh閉關修煉，bē當看電視、bē當去chhit-thô，koh bē當sńg我上愛ê手機仔。阿公阿媽真注重成績，刁工chhōa我去廟- -裡拜拜，祈求文昌帝君賜hō͘我智慧，in講：「有食藥有kiâⁿ氣，有燒香有保庇。」阿爸阿母mā會kui工tī我ê耳空邊se̍h-se̍h唸：「你著ài用心準備，nā無，三日無liū著會peh上樹。敢無聽人teh講？無好地基著起無好厝，千萬m̄-thang火燒著kha-chhng ah，chiah來hoah救命ǒ͘！」

日子一工一工過- -去，考試ê時間漸漸倚近ah，我ê壓力mā愈來愈大。Kui工親像採花蜜ê蜂仝款，無閒kah強beh chhia-poa̍h-péng。Ta̍k工放學轉- -來，kā老師派ê宿題寫好了後，著ài照進度複習功課，準備考試。人講：「Ài piàⁿ chiah會贏。」我kòa一副厚厚ê目鏡，piàⁿ到一粒頭殼gông-chhia-chhia。讀ah讀，讀到beh考試ê前一暗，iáu有幾落頁讀無了。Chit時，目睭皮已經有千斤重lo͘h，實在有影chiâⁿ thiám頭。害ah！開始teh tuh龜ah。不管啦！時到時擔當，無米chiah來煮番薯湯。Chit-má tī hia煩惱掛心mā無khah-choa̍h，時到便看，先來去睏，保tiâu明仔載ê體力kap精神khah贏。

「噹噹噹噹∼噹噹噹噹∼」上課ê鐘仔聲tân ah，beh考試ah！平常時仔，聽- -起來kài輕鬆、kài好聽ê鐘仔聲，chit陣，sòa親像走pio ê時，老師發信號ê槍聲，一聲一聲直直催，hō͘人聽著又koh緊張、又koh驚惶。本底鬧熱滾滾ê教室，隨tiām-chiuh-chiuh無半滴聲。聽著老師ê腳步聲愈kiâⁿ愈oá，我腳手肉mā開始phi̍h-phi̍h-chhoah，心臟phi̍h-pho̍k-chhái，跳kah真厲害。老師一踏入教室，著kā考試單分- -落來，ta̍k-ê隨kā筆gia̍h leh，頭殼犁犁，開始直直寫。Kui間教室kan-ta聽著喘氣ê聲kap「sa！sa！sa！」teh寫字ê聲。

我ná寫ná看手錶仔，驚時間控制了無tú好，會曉ê題目無寫- -著，按呢著無彩teh讀ah。Ta̍k條題目我lóng看kah chiâⁿ詳細，想kah chiâⁿ斟酌，chiah敢下筆寫- -落去。怪奇ê是，有ê題目明明真熟似，是按怎會hiông-hiông想bē起- -來。我急kah親像一隻chhōe無路ê羊仔囝，khiā tī原底ê所在，m̄知beh ùi tó位kiâⁿ。當teh著急ê時，想著老師bat講- -過，bē曉寫- -ê先làng- -過，會曉寫- -ê先寫，等差不多lóng完成ah，chiah koh se̍h翻頭轉來激頭腦，思考看māi bē曉- -ê beh按怎寫。人講：「驚驚bē著等。」著啦！著是按呢，勇敢向前kiâⁿ，繼續寫- -落去tō著啦！考試紙寫好勢，阮koh chiâⁿ細膩檢查幾落pái，驚有題目làu-kau- -去，á是寫m̄著- -去。我一直檢查到下課，chiah放心kā考試紙交hō͘老師。

總算考soah ah，我kui-ê人lóng khùiⁿ-oa̍h- -起來，壓力全無- -去ah，暫時koh會當過一站仔逍遙自在ê日子囉！Ta̍k-pái考試，nā有好成績，我著會親像tī樹仔頂歡喜唱歌ê鳥仔仝款，有講bē出嘴ê快樂。阿公阿媽是滿面春風真chhia-iāⁿ，連阿爸阿母mā嘴笑目笑，為我感覺真驕傲。著是因為按呢，我chiah會一直kā考試當做是一ê甜蜜ê負擔，勇敢kā承擔- -起來。Chit種辛苦落種，著有好收成ê感覺，實在真讚。我相信只要用心phah-piàⁿ，綿爛學習，自然會使人看重，得著ta̍k-ê肯定ê pho̍k仔聲。

台灣字（白話字）版

Khó-chhì ê Sî-chūn

Î? Sī siáⁿ-mih-lâng tī kàu-sek lāi-té tiong-khùi cha̍p-chiok, kóng-ōe chin tōa-siaⁿ leh? Goân-lâi, sī gún hit ê toan-chong téng-chin koh giâm-keh ê lāu-su teh kau-tài kong-khò lo͘h! Gún lāu-su it-hiòng sī hoah chúi ē kian-tàng, chàm kha ē tē-tāng, ha̍k-seng gín-á lóng tùi i chiâⁿ chun-chhûn. Lāu-su iōng chin giâm-siok ê kháu-khì kā tāi-ke hoan-hù, “Āu-lé-pài tio̍h beh khó-chhì ah, tāi-ke ài jīn-chin tha̍k-chheh, hó-hó-á ka-iû ǒ͘!” Choân-pan chi̍t thiaⁿ-tio̍h chit ê siau-sit, sûi-ê-á sûi-ê lóng “Aih!” chi̍t siaⁿ, thó͘ chi̍t ê tōa-khùi.

Tùi gún ha̍k-seng lâi kóng, “khó-chhì” sī chi̍t kiāⁿ thiⁿ-tōa-tē-tōa ê tāi-chì. Ta̍k-pái nā thiaⁿ-tio̍h beh khó-chhì, góa tio̍h ē iu-thâu kat-bīn, sim-koaⁿ-thâu kui-ê phah-kat-kiû, chai-iáⁿ pháiⁿ-miā kan-khó͘ ê ji̍t-chí iū-koh lâi ah. Ài tha̍k ê chheh thia̍p- -khí-lâi, sī pí soaⁿ koh-khah koân! Jî-chhiáⁿ chit tōaⁿ sî-kan bē-su teh pì-koan siu-liān, bē-tàng khòaⁿ tiān-sī, bē-tàng khì chhit-thô, koh bē-tàng sńg góa siōng ài ê chhiú-ki-á. A-kong a-má chin chù-tiōng sêng-chek, thiau-kang chhōa góa khì biō- -ni̍h pài-pài, kî-kiû Bûn-chhiong-tè-kun sù hō͘ góa tì-hūi. In kóng, “Ū chia̍h io̍h ū kiâⁿ-khì, ū sio-hiuⁿ ū pó-pì.” A-pa a-bú mā ē kui-kang tī góa ê hīⁿ-khang-piⁿ se̍h-se̍h-liām, “Lí tio̍h ài iōng-sim chún-pī, nā-bô, saⁿ ji̍t bô liū tio̍h ē peh-chiūⁿ chhiū. Kám bô thiaⁿ lâng teh kóng? Bô hó tē-ki tio̍h khí bô hó chhù, chhian-bān m̄-thang hóe sio-tio̍h kha-chhng ah, chiah lâi hoah kiù-miā o͘h!”

Ji̍t-chí chi̍t kang chi̍t kang kòe- -khì, khó-chhì ê sî-kan chiām-chiām óa-kīn ah, góa ê ap-le̍k mā jú lâi jú tōa. Kui-kang chhin-chhiūⁿ chhái hoe-bi̍t ê phang kâng-khoán, bô êng kah kiông-beh chhia-poa̍h-péng. Ta̍k-kang pàng-o̍h tńg- -lâi, kā lāu-su phài ê siok-tê siá hó liáu-āu, tio̍h ài chiàu chìn-tō͘ ho̍k-si̍p kong-khò, chún-pī khó-chhì. Lâng kóng, “Ài piàⁿ chiah ē iâⁿ.” Góa kòa chi̍t hù kāu-kāu ê ba̍k-kiàⁿ, piàⁿ kàu chi̍t lia̍p thâu-khak gông-chhia-chhia. Tha̍k-ah-tha̍k, tha̍k kàu beh khó-chhì ê chêng chi̍t àm, iáu-ū kúi-lo̍h-ia̍h tha̍k bô liáu. Chit-sî, ba̍k-chiu-phôe í-keng ū chhian-kin-tāng lo͘h, si̍t-chāi ū-iáⁿ chiâⁿ thiám-thâu. Hāi ah! Khai-sí teh tuh-ku ah. Put-koán lah! Sî kàu sî tam-tng, bô bí chiah lâi chú han-chî-thng. Chit-má tī hia hoân-ló kòa-sim mā bô-khah-choa̍h, sî kàu piān-khòaⁿ, seng lâi khì khùn, pó-tiâu bîn-á-chài ê thé-la̍t kap cheng-sîn khah iâⁿ.

“Tang tang tang tang∼ Tang tang tang tang∼” Siōng-khò ê cheng-á-siaⁿ tân ah, beh khó-chhì ah! Pêng-siông-sî-á, thiaⁿ- -khí-lâi kài khin-sang, kài hó-thiaⁿ ê cheng-á-siaⁿ, chit-chūn, sòa chhin-chhiūⁿ cháu-pio ê sî, lāu-su hoat sìn-hō ê chhèng-siaⁿ! Chi̍t siaⁿ chi̍t siaⁿ ti̍t-ti̍t chhui, hō͘ lâng thiaⁿ-tio̍h iū-koh kín-tiuⁿ, iū-koh kiaⁿ-hiâⁿ. Pún-té nāu-jia̍t-kún-kún ê kàu-sek, sûi tiām-chiuh-chiuh bô pòaⁿ tih siaⁿ. Thiaⁿ-tio̍h lāu-su ê kha-pō͘-siaⁿ jú kiâⁿ jú oá, góa kha-chhiú-bah mā khai-sí phi̍h-phi̍h-chhoah, sim-chōng phi̍h-pho̍k-chhái, thiàu kah chin lī-hāi. Lāu-su chi̍t ta̍h-ji̍p kàu-sek, tio̍h kā khó-chhì-toaⁿ pun- -lo̍h-lâi, ta̍k-ê sûi kā pit gia̍h leh, thâu-khak lê-lê, khai-sí ti̍t-ti̍t siá. Kui-keng kàu-sek kan-ta thiaⁿ-tio̍h chhoán-khùi ê siaⁿ kap “sa! sa! sa!” teh siá-jī ê siaⁿ.

Góa ná siá ná khòaⁿ chhiú-pió-á, kiaⁿ sî-kan khòng-chè liáu bô tú-hó, ē-hiáu ê tê-bo̍k bô siá- -tio̍h, án-ne tio̍h bô-chhái teh tha̍k ah. Ta̍k-tiâu tê-bo̍k góa lóng khòaⁿ kah chiâⁿ siông-sè, siūⁿ kah chiâⁿ chim-chiok, chiah káⁿ hē-pit siá- -lo̍h-khì. Koài-kî ê sī, ū ê tê-bo̍k bêng-bêng chin se̍k-sāi, sī án-chóaⁿ ē hiông-hiông siūⁿ bē khí- -lâi? Góa kip kah chhin-chhiūⁿ chi̍t chiah chhōe bô lō͘ ê iûⁿ-á-kiáⁿ, khiā tī goân-té ê só͘-chāi, m̄ chai beh ùi tó-ūi kiâⁿ. Tng teh tio̍h-kip ê sî, siūⁿ tio̍h lāu-su bat kóng- -kòe, bē-hiáu siá- -ê seng làng- -kòe, ē-hiáu siá- -ê seng siá. Tán chha-put-to lóng oân-sêng ah, chiah koh se̍h-hoan-thâu tńg-lâi kek-thâu-náu, su-khó khòaⁿ-māi bē-hiáu- -ê beh án-chóaⁿ siá. Lâng kóng, “Kiaⁿ-kiaⁿ bē tio̍h-téng.” Tio̍h lah! Tio̍h-sī án-ne, ióng-kám hiòng-chiân-kiâⁿ, kè-sio̍k siá- -lo̍h-khì tō tio̍h lah! Khó-chhì-chóa siá hó-sè, gún koh chiâⁿ sè-jī kiám-cha kúi-lo̍h-pái, kiaⁿ ū tê-bo̍k làu-kau- -khì, á-sī siá m̄-tio̍h- -khì. Góa it-ti̍t kiám-cha kàu hā-khò, chiah hòng-sim kā khó-chhì-chóa kau hō͘ lāu-su.

Chóng-sǹg khó soah ah, góa kui-ê lâng lóng khùiⁿ-oa̍hkhí-lâi, ap-le̍k choân bô- -khì ah. Chiām-sî koh ē-tàng kòe chi̍t-chām-á siau-iâu chū-chāi ê ji̍t-chí lo͘h! Ta̍k-pái khó-chhì, nā ū hó sêng-chek, góa tio̍h ē chhin-chhiūⁿ tī chhiū-á-téng hoaⁿ-hí chhiùⁿ-koa ê chiáu-á kâng-khoán, ū kóng bē chhut chhùi ê khoài-lo̍k. A-kong a-má sī móa-bīn chhun-hong chin chhia-iāⁿ, liân a-pa a-bú mā chhùi-chhiò-ba̍k-chhiò, ūi góa kám-kak chin kiau-ngō͘. Tio̍h-sī in-ūi án-ne, góa chiah ē it-ti̍t kā khó-chhì tòng-chò sī chi̍t ê tiⁿ-bi̍t ê hū-tam, ióng-kám kā sêng-tam- -khí-lâi. Chit chióng sin-khó͘ lo̍h-chéng, tio̍h ū hó siu-sêng ê kám-kak, si̍t-chāi chin chán. Góa siong-sìn chí-iàu iōng-sim phah-piàⁿ, mî-nōa ha̍k-si̍p, chū-jiân ē sú lâng khòaⁿ-tiōng, tit-tio̍h ta̍k-ê khéng-tēng ê pho̍k-á-siaⁿ.

讀hōo你聽