【專文】柯文哲正經的競選演講

文/劉重義

柯文哲在台灣民眾黨四周年黨慶，發表的競選演講，完全無平常肖叮噹胡說八道的脫線演出。伊認真正經談台灣社會當前的困境和問題，輕可著挖開民進黨和支那黨腐敗無能的臭孔，卻完全無包袱仔地講好聽話畫大餅，要打動求變的台灣人心。

真濟台灣人對兩黨討厭失望，已經是長期累積起來的感受：外來的支那黨因為失去執政權，
由反共變親共要來奪回過去壓制、剝削台灣人的好日子；另外，予台灣人支持、寄望導台灣獨立的民進黨，卻背棄民族願景，自甘沉淪做外來假「支那民國」民族壓迫體制的買辦，專注在爭「錢、權」的腐敗。

柯文哲事實上嘛是無理想、無撇步，對社會議題差不多是照兩黨的講法，有樣看樣仝款來騙無辜的台灣人，無法度提出甚麼可以予人認可的解決方案和意志。總是，伊的黨在台灣社會還無執政過，無直接暴露予人反感的臭孔，遮予伊可能爭取著相當部分，按算死馬當作活馬醫的台灣人的選票。

在兩岸問題，柯文哲幾乎是照兩黨長期欺騙台灣人的公式在唸，當然呣敢表示要向支共跪拜投降，放屁安狗心，當然嘛無能力嘛無心意喚起台灣人對民族前途的信心。不如過，伊是到今唯一敢公開正面使用「台灣民族」字眼的候選人。就伊常在肖叮噹黑白講的歹紀錄，伊真可能嘛是無意中講出「台灣民族」四字。

個人聽柯文哲這擺較正經的演講了的淺見，柯文哲平時採取的亂七八糟姿態和言語，目的應該是要凝聚社會注意力，提高自己的知名度，然後在正式演講認真正經談政見，彼寡已經對現狀相當不滿和反既得利益的台灣人，真可能擦消對伊彼種驕傲、三八無體統的觀感，將選票投予伊。