【專欄】中國話和平就是屠殺

文：陳月妙 （台灣教授協會副會長、中正大學外文系前系主任退休教授）

外來難民黨，愈來愈聳鬚，愈來愈囂俳，欲帶台灣人入共產地獄，講是按呢就有和平。

in敢毋知，中國人的和平就是大屠殺？228, 3月初8, 中國兵佇基隆港猶未上岸就大開殺戒，機關鎗砰砰叫，無分別的掃射，一目睨，美麗基隆海港變紅海，死傷無數。尾矣，社寮島被走路黨號名變做“和平島”。

猶有，以前台北有艋舺到新店的萬新線五分仔車鐵枝路，有一個站叫做馬場町站。馬場町是走路難民集團白色恐怖時代鎗殺無辜受難者的所在。尾矣，走路集團就共改名號做“和平”站。

閣有，228大屠殺期間攏佇新店溪邊成排無經過審判就處決台灣人。了後，新店溪邊中和溪洲地區成立新的城鎮，就號做“永和”。有中國難民的所在，人掠厝拆雞仔鳥仔掠甲無半隻，就像這馬佇立法院吵家揦geh，敢有永遠和平？

228是福爾摩沙民族大屠殺。結果，無228大屠殺紀念日，是“和平”紀念日。

按呢，咱就了解，中國人所謂的和平，就是人攏屠殺掉，彼個所在，就有和平。

這馬2025年，竟然出現上大尾的難民黨主席騙講和解就有和平。228的教訓猶無偌遠，而且共產黨閣威脅講：“留島無留人”。台灣人毋通閣再憨憨仔想，驚戰爭叫是和解就有和平。我講真話，和解就是跪落去投降，投降了後就是予共匪佔領予人大屠殺，絕對無生路。

咱欲行活路，行咱家己的路。就是認真備戰、日日夜夜抵抗、堅定精神意志對內外的中國人講：No！

為著展現咱抵抗的意志，咱嘛欲時時堅定講咱家己的語言，做咱家己，表現堅定意志做咱的台灣人，毋是講北京話講敵國的語言。

最後閣講一句：“中國人的和平，就是大屠殺”。圖伯特達賴喇嘛1959簽下和平協議了後，就迎來中國大軍進駐屠殺，伊只好逃難流亡印度。

228大屠殺的福爾摩沙台灣民族苦難，達賴的亡國流亡印度。按呢，敢猶無夠清楚？

咱絕對無愛閣再228輪迴啦！咱攏做伙自信講咱家己的話，咱攏日夜大聲嗆內外中國人講：No!